O 14 de agosto de 2018 fixéronse 86 anos da colocación dunha placa na oliveira de Vigo por parte da corporación republicana de entón. Foi protexida cun enreixado de ferro e unha cancela e colocouse unha placa de bronce acreditando a promesa que perante ela, fixeron os vigueses de “amor, lealdade e abnegación pola nosa cidade”, en agosto de 1932, sendo alcalde o republicano Amando Garra.

Lembrando esa data un grupo de republicanos vigueses xuntouse na mesma praza 86 anos despois. Ademais, quixeron lembrar a traxedia acontecida en Xapón co lanzamento de dúas bombas atómicas.  Fixérono tamén fronte á oliveira, símbolo internacional da paz.

Durante a última gran guerra, EE.UU conseguiu a rendición xaponesa con dúas bombas atómicas que asolaron as cidades de Hiroshima e Nagasaki e as converteron no símbolo da traxedia .Anos máis tarde, o desenvolvemento das armas químicas e o aumento da tensión internacional levaron á Guerra Fría.