O xulgado de instrución número 1 de Vigo decretou o sobresemento provisional e arquivo das actuacións relativas ao falecemento dun mozo, que foi localizado moribundo nas inmediacións do museo MARCO, na cidade olívica, o pasado 1 de abril.

Nun auto, a xuíza expón que o mozo foi atopado cun traumatismo cranioencefálico severo e faleceu pouco despois, sen que o exame forense ou a investigación policial puidesen determinar que a morte fora violenta ou resultado dun delito.

Así, ademais da autopsia, examinouse o móbil do falecido e as imaxes captadas por cámaras de gravación de establecementos próximos ao lugar no que apareceu o mozo. Tamén se tomou declaración a testemuñas, e nas dilixencias practicadas “non aparece debidamente xustificada a perpetración de delito algún”, polo que non hai “indicios de que se trate dun falecemento violento sospeito de criminalidade”.