O deporte está tamén presente nas Festas de San Telmo. Este sábado celebrarase a Carreira Solidaria e o domingo e o luns a Feira Cabalar, dous eventos que foron presentados na mañá deste martes por parte do Concello.
O alcalde de Tui, Enrique Cabaleiro, salientou que a Carreira Popular “sempre tivo altísima participación” e agradeceu ao Club Atletismo Tui “a súa implicación nesta proba e no desenvolvemento da práctica deportiva, en especial do atletismo”.
Tratarase dunha carreira popular con inscrición gratuíta, pero solidaria coa aportación dun quilo de alimentos para SOS Tomiño-Baixo Miño. Esta proba deportiva celebrarase este sábado a partir das 11 horas con saída dende o Paseo da Corredoira. A inscrición está aberta ata este mércores ás 23.59 h na web clubatletismotui.wordpress.com.
FEIRA CABALAR
Con respecto á Feira Cabalar, que este ano se celebrará ao longo de dúas xornadas, domingo e luns, Enrique Cabaleiro destacou que Tui “ten a peculiaridade de que hai moitísima afección ao mundo dos cabalos, podemos dicir que somos unha potencia nese senso, e iso débese, entre outras cousas, ás e aos profesionais que están traballando día a día”.
Amosou tamén o seu agradecemento á Peña Cabalar Valle do Louro
“pola súa implicación constante no desenvolvemento de actos relacionados co mundo equino” e á Asociación Cultural San Roque e San Bartolomeu que “sempre foron a alma mater de que en San Bartolomeu se puidera desenvolver este evento”. Tamén agradeceu a colaboración e
implicación de Equigalia, e tivo palabras de lembranza para Luís Pimentel, “unha persoa moi implicada no mundo cabalar”.
