O alcalde de Vigo, Abel Caballero, celebrou este martes que a cidade continuará abastecéndose de auga do río Oitavén e do Verdugo, mentres que outros municipios da zona poderían recibir auga do Miño chegado o momento de que sexa necesario un transvasamento.
Así o indicou Caballero despois de que o pasado venres a Confederación Hidrográfica do Miño-Sil fixese público o estudo definitivo de alternativas para garantir o abastecemento futuro de auga en Vigo e a zona sur da provincia de Pontevedra, onde se recolle a opción elixida como óptima.
A CHMS remitiu á Xunta e ao Concello de Vigo, as dúas administracións coas que se asinou o convenio para a redacción de dito informe, este documento, cuxas conclusións son practicamente as mesmas que as recollidas no informe preliminar que se deu a coñecer en setembro do ano pasado.
Da análise realizada, os técnicos conclúen que a mellor opción sería a execución dun conxunto de varias actuacións complementarias: unha captación de auga na confluencia dos ríos Oitavén e Verdugo; unha pequena presa augas arriba do encoro de Eiras, na canle do Oitavén; unha impulsión de auga desde o Miño ao encoro de Zamáns; e unha condución por gravidade para conectar as redes de Nigrán e Gondomar.
Preguntado sobre por quen pagaría esa nova presa, Caballero indicou que deberían ser o Goberno de España e a Xunta, xa que non só abastecerá a Vigo senón tamén a outros municipios da zona.
Pola súa banda, o rexedor olívico puxo en valor que a cidade investirá 25 millóns de euros na nova potabilizadora de auga, que estará en funcionamento o ano que vén. Neste aspecto, Caballero volveu a cargar contra o Goberno autonómico, xa que, segundo el, lle pediu que financiase este investimento porque dará auga a outros concellos como Cangas ou Moaña e non só a Vigo, pero o Executivo galego “dixo que non”, sempre segundo palabras de Abel Caballero.
