Galicia tiña ouro e os romanos levárono todo –que se saiba–. Un dos xacementos máis ricos do preciado mineral estaba na conca miñota do Condado-Paradanta, unha área na que as fisuras da intervención romana persisten sobre a orografía dos terreos; maquilladas, iso si, pola mesta vexetación e o paso dos anos.
Agora será posible coñecer máis de preto tal patrimonio histórico grazas á ruta que vén de anunciar o Concello de Arbo e que será presentada no Centro de Interpretación do Viño e a Lamprea “Museo Arabo” o vindeiro 16 de abril ás 19:00 horas.
A iniciativa recibe o nome de “Ruta de las Minas de Oro Romanas junto al Rio Miño. As Neves y Arbo” e, compartida por ambos concellos, será presentada por Eduardo González Clavijo, autor dun díptico promocional da iniciativa. De acordo co Concello de Arbo, a xornada estará aberta o público “ata cubrir aforo”.
Segundo explican as mesmas fontes, a ruta das minas de ouro comeza na parroquia de Barcela do termo municipal de Arbo. “Con esta presentación pretendese por en valor as minas de Ouro de Barcela, e comezar así a andadura para poder recuperar este patrimonio”, inciden.
