O alcalde de Vigo, Abel Caballero, rexeitou este martes as acusacións do BNG sobre a “politización” da Medalla da Cidade, que este ano será entregada á secretaria de Estado do Mitma e expresidenta de Adif, Isabel Pardo de Vera, e atribuíu as críticas da formación nacionalista á súa oposición ao AVE entre a cidade e Madrid.
Nunha rolda de prensa, e a preguntas dos xornalistas, o alcalde asegurou que, cando se outorga a Medalla da Cidade, ou o galardón de Vigueses Distinguidos, “non se ven os partidos políticos”, senón que se recoñece a traxectoria e labor en favor de Vigo das persoas ou entidades homenaxeadas.
CRÍTICAS DA OPOSICIÓN
Tras o anuncio de Caballero de que Pardo de Vera será acredora da Medalla de Vigo, pola súa contribución no avance do AVE directo Vigo-Madrid por Cerdedo, a saída sur, ou polo impulso para a finalización da estación de Urzáiz, o concelleiro do BNG, Xabier Pérez Igrexas, lamentou o “descarado” uso político deste recoñecemento por parte do rexedor.
O edil nacionalista atribuíu a decisión á deriva ” autoritaria” do rexedor e expresou o seu rexeitamento a ese recoñecemento, cuxa finalidade é o intento do alcalde de “seguir agasallando e lamendo a bota” do Goberno de España. “Que quere premiar? Que a saída sur está entrampada noutro estudo? A deficiente conexión ferroviaria? A negativa a implementar un tren de proximidade?”, cuestionou.
O alcalde respondeu a esas críticas afirmando que o concelleiro do BNG “está enfadado porque se opón a que Vigo teña AVE”. Respecto diso, incidiu en que, cando a cidade quedou fóra das conexións de alta velocidade “en tempos de Fraga”, o alcalde olívico era o nacionalista Lois Pérez Castrillo, que “non defendeu” á cidade.
Pola súa banda, o grupo municipal do PP expresou tamén o seu rexeitamento á concesión da Medalla a Pardo de Vera, e confirmou o seu voto en contra no pleno que se celebrará este mércores (no que tamén se aprobará o recoñecemento aos Vigueses Distinguidos 2022).
Segundo entenden os ‘populares’, “está a premiarse un goberno que non é merecedor de tal distinción, a xulgar polo estado de abandono en que está Vigo desde que goberna o PSOE en Madrid”.
O portavoz do grupo municipal, Alfonso Marnotes lamentou “a utilización, de novo, de forma política dun galardón que debería recoñecer o traballo de quen defenden a Vigo e traballan pola súa cidade”. Segundo engadiu, “neste caso trátase dunha utilización por parte de Abel Caballero para tapar todos os agravios do goberno de Pedro Sánchez con Vigo“.
A Marea de Vigo uniuse ás críticas do resto da oposición e confirmou igualmente o seu voto en contra no pleno deste mércores.
