O BNG denunciou este venres que a Xunta é “cómplice e consentidora” da precariedade laboral do persoal do hospital Povisa (do grupo Ribera), e instou o goberno galego a “fiscalizar” o concerto co centro sanitario e o uso do diñeiro público que se lle transfire. Así o manifestou a deputada e portavoz de Sanidade do BNG no Parlamento galego, Montse Prado, que este venres, xunto coa deputada Alexandra Fernández e o concelleiro Xabier Pérez Igrexas, mantivo unha reunión co comité de persoal do hospital.
Prado trasladou o apoio da formación nacionalista ao comité, que iniciou mobilizacións para reclamar a negociación dun convenio digno, con aumento de salarios (conxelados desde hai máis de 10 anos) e estabilidade nas xornadas e quendas de traballo.
A deputada do BNG lembrou que Povisa recibe máis de 90 millóns ao ano de diñeiro público para atender unha poboación dunhas 140.000 persoas de Vigo e outros municipios da comarca, polo que o goberno galego “non pode desentenderse” das condicións laborais do persoal. “A empresa só busca o lucro (…). pero a Xunta non pode seguir sendo cómplice e consentidora, ten que fiscalizar, mediar no conflito”, incidiu.
A presidenta do comité, Chus Neira (CIG), subliñou a “necesidade urxente” de que se negocie un novo convenio que mellore as súas condicións. “É unha pena que, un mes despois de romperse a negociación, a empresa non presentou unha oferta que mellore o anterior”, explicou e advertiu de que “se isto segue así, valorarase a convocatoria dunha folga”.
Finalmente, o concelleiro do BNG en Vigo, Xabier Pérez Igrexas, lamentou o “enroque” da actual propietaria do hospital, e insistiu en que o modelo de concerto singular do que se beneficia Povisa é unha ” grave anomalía” que o Sergas debe emendar.
