O Xulgado de Primeira Instancia nº9 de Vigo exonerou a un matrimonio de pagar unha débeda de preto de 45.000 euros, con base na Lei da Segunda Oportunidade.
Segundo informa a Asociación de Axuda ao Endebedamento, este matrimonio viuse afectado pola pandemia, de maneira que quedou só cunha nómina reducida por unha menor xornada laboral, polo que non podía afrontar o pasivo co que contaba.
Para acollerse a ese procedemento de segunda oportunidade son obrigatorios algúns requisitos: a insolvencia do interesado, que a contía global da débeda non supere os cinco millóns de euros, o intento dun acordo de pagos (neste caso foi rexeitado polos acredores) e que non fose condenado por delitos socioeconómicos.
Unha vez comprobados estes supostos ditouse a resolución definitiva pola que se concede o Beneficio de Exoneración do Pasivo Insatisfeito (BEPI), que supuxo deixar a estes debedores libres dos 44.352,44 euros que tiñan que pagar.
Esta sentenza deixa sen cobrar nada aos acredores –entre eles Wizink, Caixabank, Cetelem e Sabadell– e permite á parella solicitar a exclusión de todo ficheiro de morosidade, explica esta asociación.
