A Plataforma en Defensa da Enseada de San Simón, así como entidades veciñais de Chapela e Cedeira, en Redondela, pediron ás administracións que colaboren coa xustiza no procedemento aberto tras a denuncia da Fiscalía contra Aucosa polas verteduras da planta, por un suposto delito contra os recursos naturais e o medio ambiente.
Nun comunicado, estas entidades explicaron que o ministerio público formulou denuncia por vía penal e o xulgado de instrución 2 de Redondela abriu dilixencias previas de investigación. Neste procedemento presentáronse xa informes policiais, analísticas de verteduras e un estudo pericial sobre as supostas irregularidades da empresa, que se dedica á fabricación de aceites e fariñas de peixe.
Precisamente, ese informe pericial, presentado por entidades veciñais e elaborado por un catedrático, conclúe que a autorización municipal de vertedura a Aucosa vulnera a normativa sobre saneamento e depuración de augas residuais e que, entre outras irregularidades, as medicións realizadas por un laboratorio para a empresa exclúen a existencia de nitróxeno nítrico de forma sistemática, a pesar de que é un parámetro crítico de control obrigatorio polo seu elevado potencial contaminante.
Así as cousas, veciñanza e colectivos que denuncian a situación enviaron solicitudes tanto ao Concello de Redondela como ao de Vigo, á Xunta e ao Ministerio de Transición Ecolóxica para que se personen no procedemento e colaboren coa xustiza, co fin de impedir “a comisión dun posible delito e a súa continuidade”.
Ademais desta denuncia, as entidades veciñais teñen outras frontes abertas con respecto a Aucosa e, recentemente, deron a coñecer unha sentenza que lles dá a razón e anula a licenza de ampliación da empresa concedida polo Concello, por non axustarse á legalidade urbanística.
