A Deputación de Pontevedra celebrará na tarde deste xoves no Auditorio Mar de Vigo a Gala Provincial de Turismo, que estará conducida por Xasmín Abuín e contará coa actuación de Tanxugueiras e Pablo Méndez Performance.
Tal como indicou a administración provincial nun comunicado, o evento encherá de cor, son e imaxe o Auditorio, cun gran espectáculo audiovisual cheo de sorpresas que, “ao máis puro estilo cinematográfico”, contará con photocall, alfombra vermella e un enorme escenario cunha pantalla curva de 17 metros de longo, onde se mostrarán todas as potencialidades do destino Pontevedra Provincia.
Máis de 350 persoas reuniranse nun evento que, baixo o fío condutor da campaña ‘Love Rías Baixas’, contará coa música de Tanxugueiras e co show de Pablo Méndez Performance. “Vai ser impresionante. Temos preparada a mellor gala dos últimos anos”, subliñou a presidenta da Deputación de Pontevedra, Carmela Silva.
Na gala nomearase á Ruta do Viño como nova Embaixadora Rías Baixas e entregaranse os distintivos de calidade aos 163 novos establecementos de 27 concellos da provincia que obtiveron o selo SICTED de calidade turística.
