A campaña de prevención sobre o cannabis que puxeron en marcha o Concello de Moaña e a Asociación Érguete durante o 2021 xa formou case 100 adolescentes do IES Plurilingüe A Paralaia e do IES As Barxas co obxectivo de achegar ao alumnado conceptos e ferramentas de prevención e sensibilización respecto ao cannabis.

A concelleira de Benestar Social, María Ortega, destacou os resultados e salientou “a importancia de estar ao lado dos mozos e mozas para axudalos a entender a problemática das adiccións, sempre con empatía e sen estigmatizar nin culpabilizar”. A edil tamén engadiu que, ademais deste programa, o Concello e a Asociación Érguete seguen traballando para poñer en marcha outros proxectos na liña de previr as adiccións no municipio do Morrazo.

A coordinadora da Oficina Técnica de Prevención da Asociación Érguete, Laura Durán, explicou que “levamos anos colaborando cos centros de educación primaria e coas familias para falar dos perigos do atracón do alcol, do xogo online e das apostas deportivas”. Así mesmo, agradeceu ao Concello de Moaña “a súa implicación coas nosas propostas”, convencida que este tipo de políticas preventivas son as “máis axeitadas para traballar no ámbito das adiccións”.