Air Nostrum, a aerolínea franquiada de Iberia para voos rexionais, vai ofertar de abril a setembro un total de 888 voos no aeroporto de Vigo. As cifras supoñerán todo un fito para a compañía no aeroporto de Peinador xa que serán uns 29% superiores en prazas ofertadas respecto ao mesmo período de 2019.

A tempada estival de voos foi presentada hoxe no aeroporto vigués polo alcalde de Vigo, Abel Caballero, quen estivo acompañado polo director comercial de Air Nostrum, Juan Corral.

A aposta de Air Nostrum polo aeroporto vigués é decidida. A compañía pon á venda case 90.000 prazas o que supón un incremento de 19.000 respecto a 2019, a última tempada de verán anterior á pandemia. A aerolínea quere colaborar coa reactivación do turismo e da economía viguesa.

En voos, Air Nostrum chegará aos 888 nos máis de cinco meses de operativa estival, o que tamén supón un gran incremento respecto a 2019 cando levaron a cabo 168 operacións menos das que agora están programadas.