O alcalde de Vigo, Abel Caballero, reiterou a súa petición á Xunta de Galicia para que busque unha fonte de abastecemento de auga para a cidade que poida ser utilizada en casos de emerxencia. Despois de que este luns o Goberno galego declarase a prealerta por seca na demarcación hidrográfica Galicia-Costa, o rexedor vigués volveu a solicitar unha alternativa para Vigo en caso de escaseza de auga.
“Xa llo pedimos en 2013 e en 2017”, subliñou Caballero, quen lamentou que “a Xunta non fai nada” xa que aínda a cidade non ten esta alternativa. Aínda así, en rolda de prensa Caballero mandou unha mensaxe tranquilizadora, explicando que nestes momentos a presa que abastece Vigo está ao 80%, o máximo permitido nesta época do ano, polo que por agora non haberá escaseza de auga, aínda que se continúa a seca podería darse “no outono”.
MUSEALIZACIÓN DE O CASTRO
Por outra banda, Caballero tamén se referiu ao proxecto de musealización do Castro, que “redescubrirá” un túnel que se atopa na zona e que percorre desde a parte baixa ata a alta do Castro.
Sobre iso, o alcalde indicou que en setembro se presentou o proxecto á Xunta, xa que se trata dun Ben de Interese Cultural (BIC), que foi respondido en decembro solicitando diferentes aspectos “que non son competencia autonómica”. Aínda así, en xaneiro o proxecto foi modificado polo Concello e enviado ao Executivo galego. “Seguimos esperando e xa levamos 5 meses de atraso”, lamentou Abel Caballero.
Respecto diso, fontes da delegación da Xunta en Vigo explicaron que os técnicos aínda están a analizar o novo documento presentado polo Concello “Trátase dun expediente moi complexo, que polas súas características require dunha revisión exhaustiva, pois estamos a falar dun BIC. En todo caso, os técnicos están a traballar no informe correspondente e o seguinte paso sería elevalo ao consello territorial”, destacaron.
