Empresarios da hostalaría e o comercio de Vigo premiaron este luns ao alcalde, Abel Caballero, polo seu labor e contribución ao desenvolvemento económico e turístico da cidade.

Caballero recibiu da man de César C. Sánchez-Ballesteros Fernández, presidente de Hostalaría de Pontevedra e Hostalaría de Vigo, e de Roberto Giráldez, presidente da Federación de Comercio de Vigo, un galardón en nome dos empresarios do sector en recoñecemento “á súa implicación na creación e desenvolvemento de iniciativas que, durante os últimos anos, supuxeron un impulso no incremento do desenvolvemento económico da cidade, potenciando o turismo en xeral, coa chegada e atracción de turistas e visitantes, e a hostalaría, a hospedaxe, a restauración e o comercio en particular”.

Tal como indicaron as tres asociacións, estas iniciativas actuaron “de reclamo” e provocaron que os medios de comunicación a nivel estatal falen de Vigo, “espertando a curiosidade de moitas persoas por coñecer a cidade”.

“Puxo a Vigo non só nas luces de Nadal, senón que o puxo na mente de todos os españois. Agora Vigo é unha cidade coñecida en toda España, e esperamos que ese impulso turístico que hoxe temos sexa capaz de cambiar a conciencia da cidade, que se poidan crer que somos unha entidade turística de primeira orde“, reivindicou César Ballesteros.

Pola súa banda, Abel Caballero agradeceu o recoñecemento e puxo en valor a importancia da hostalaría e do comercio. “Vós sodes máis que economía, sodes unha parte moi importante da economía pero sodes máis, sodes a proximidade e a amizade, a forma de entender a relación con tanta xente que desde tantos lugares do mundo vén a Vigo”, subliñou.