Un matrimonio conformado por un home e unha muller de entre 60 e 65 anos de idade foi atopado este venres morto na súa vivenda de Vigo. A Policía Nacional que investiga o crime, nun caso do que se fixo cargo o Xulgado de Garda número 6, trata de esclarecer se a muller do matrimonio apuñalou o seu marido e logo se suicidou.

Fontes da investigación confirmaron a Europa Press que, a falta dos exames da autopsia e do resultado das pescudas, o home morreu como consecuencia de varias puñaladas. A muller non presenta signos de violencia externos visibles. Ademais, as mesmas fontes da investigación apuntaron que a casa estaba pechada, non había indicios de que ninguén entrase na vivenda, situada na rúa Álvaro Cunqueiro de Vigo.

A voz de alerta deuna unha filla do matrimonio, que acudiu o venres sobre as 19 horas ata a vivenda acompañada dunha comitiva policial, posto que había varios días que non lograba localizar aos seus pais. A comitiva xudicial levantou os corpos das vítimas pasadas as 21,00 horas da noite deste venres. Outra das claves para a investigación será a práctica do exame forense, así como se pescuda se na parella había denuncias previas.