O candidato do PP á presidencia do partido en Vigo, Javier Guerra anunciou este mércores que non se vai a conformar coa lexitimidade que lle outorgue “un censo coas limitacións coñecidas neste congreso”, e anunciou que, se é elixido, porá en marcha unha campaña de activación de afiliados e de fomento do rexistro de simpatizantes.
O obxectivo, expón nun comunicado, é “o de consolidar un partido forte para presentarse ante a cidadanía tras unha convención aberta que demostre a verdadeira dimensión do partido na cidade”. Javier Guerra indicou que comparte co resto da súa candidatura o “orgullo” de pertencer ao Partido Popular de Vigo e destaca que, para garantir uns bos resultados, é necesario “lograr unha maior atención e un mellor trato para a cidade por parte de todas as administracións”.
Pola súa banda, a tamén candidata Marta Fernández-Tapias apostou hoxe por dar máis voz e un maior protagonismo aos mozos na estrutura do partido, pois “o futuro é seu”, dixo. Ademais, volveu defender a necesidade de construír un PP que sexa un reflexo da sociedade, “onde a renovación e a xuventude atopan oco entre a preparación e a experiencia, buscando dentro e fóra das nosas filas”.
