Un veciño de Mos, de 18 anos, e dous menores de 16 e 17 anos resultaron ser os presuntos autores dunha tentativa de roubo con intimidación que sufriu outro menor de 15 anos, o pasado mes de novembro no municipio pontevedrés. As investigacións realizadas por efectivos do Equipo de Policía Xudicial da Garda Civil de Vigo concluíron coa detención do mozo de 18 e do menor de 16.

O outro menor foi notificado na súa condición penal de investigado como colaborador necesario para levar a cabo a execución do delito. Os feitos sucederon a finais do mes de novembro cando este mozo, maior de idade e veciño de Mos, preparoulle unha “encerrona” a un menor, de 15 anos, que pretendía comprar unha motocicleta de segunda man.

O adulto simula atopar un vendedor a través de Internet e concertan a transacción para o día 26 de novembro, nun determinado punto do municipio. Os dous acudiron á cita á hora prevista para que o menor se fixese cargo da motocicleta, previo pago dos 900 euros que levaba consigo.

Pero os feitos non ocorreron como estaba previsto e os dous saíron fuxindo precipitadamente cando o menor observa a presenza dunha terceira persoa que saía de detrás dunha marquesiña coa cara cuberta cunha careta e cunha pistola na man.

O menor deuse á fuga e conseguiu porse a salvo despois de esconderse na nave dunha empresa próxima ao lugar, mentres que o mozo de 18 anos, na súa primeira manifestación, dixo que fora alcanzado e ameazado polo individuo que levaba a pistola e que despois dun forcexeo conseguiu porse fóra do seu alcance.

CONIVENCIA DOS TRES

Os investigadores desenmascararon a coartada e concluíron que o mozo, maior de idade, pretendía roubar os 900 euros que levaba o menor que estaba interesado na compra da motocicleta.

Para iso púxose en conivencia con outros dous mozos, ambos os menores de idade: o que apareceu coa careta e a suposta pistola, de 16 anos, que foi detido, e outro de 17 que foi notificado como investigado, como colaborador, por ser o que facilitou a pistola e contribuír nos labores da vixilancia mentres se desenvolvían os acontecementos.

Tanto a pistola, que resultaría ser simulada, como a careta que se utilizou na tentativa do roubo, localizáronse escondidas no medio do monte, nas inmediacións dunha urbanización. As dilixencias foron postas a disposición do Xulgado de Garda do Porriño, e envíase copia das mesmas á Fiscalía de Menores.