Axentes da Policía Local de Vigo detiveron a un veciño da cidade, D.S.V., de 44 anos, como presunto autor dun delito de violencia de xénero, tras ameazar á súa parella e tirarlle as súas cousas pola vivenda durante unha discusión, en presenza do fillo de ambos.
Segundo informaron fontes policiais, os feitos ocorreron na noite deste mércores, cando o 092 recibiu un aviso de que se estaba producindo unha forte discusión de parella nun domicilio da rúa Pi e Margall.
Unha dotación desprazouse ao lugar e atopouse cun home no portal de acceso ao edificio. O home recoñeceu que tivera unha rifa coa súa parella. Os axentes entrevistáronse entón coa muller, que se atopaba en estado de nerviosismo e ansiedade, e que relatou que o home comezou unha disputa con ela por motivos irrelevantes, e que esta comezou a subir de ton.
Segundo o seu testemuño, o home empezou a tirar as súas pertenzas por todo o piso e, cando ela lle dixo que ía chamar á Policía, o sospeitoso dirixiuse a ela facendo o xesto de que lle ía a cortar o pescozo. Todo isto ocorreu en presenza do fillo menor de ambos, de 11 anos de idade. Por estes feitos, a Policía procedeu á detención do home, como presunto autor dun delito de violencia de xénero.
