Un ano máis, a veciñanza do lugar de Sobredo (Guillarei – Tui) volve homenaxear a Cándida Rodríguez, de Pazos de Reis (Tui); Xoaquín Estévez, de Soutelo (Salceda); e Venancio González, de Budiño (Salceda), que foron asasinados cando a Garda Civil disolveu a tiros unha concentración de labregos e labregas que se opoñían ao embargo de bens a un veciño que non pagaba rendas de foros.
Da man do Instituto de Estudos Agrarios Mártires de Sobredo, a homenaxe a estas tres persoas, que hoxe seguen sendo símbolo de loita contra as inxustizas, terá lugar o 28 de novembro, cando se cumpren 99 anos daquel día en que perderon a vida.
“Sobredo, dende ese momento, forma parte na memoria colectiva como símbolo e lugar no que a sociedade labrega galega é martirizada; unha sociedade agraria que loitaba pola plena propiedade da terra; único medio de sustento, nunha época de penuria e carencias ás que se trataba dar remedio coa emigración, naquela época a América; quedando as mulleres ao cargo da casa e familia”, sinala o Instituto nun comunicado.
Unha delas, Cándida Rodríguez, representa o “papel protagonista da muller nas loitas sociais de comezos do século XX”, e, segundo o Instituto, “dá testemuñado o seu martirio en moitas da traxedias desencadeadas pola represión exercida nesa altura”.
PROGRAMA
O acto de homenaxe terá lugar ao pe do Monumento aos Mártires, da autoría do escultor Camilo Nogueira; obra levantada no décimo aniversario, en novembro de 1932; e dinamitada en xullo do 1936, nos primeiros días do golpe de estado franquista. Coa recuperación da memoria dos feitos, dende 1986, e a reconstrución do monumento, en 1988, por iniciativa de entidades veciñais (asociacións culturais e comunidades de montes), realízase anualmente o acto conmemorativo aos Mártires de Sobredo.
Neste ano 2021, no domingo 28 de novembro, os actos desenvolveranse de acordo ao seguinte programa: concentración ás 11,00 horas na Carballeira de Sobredo, desprazamento ata o monumento ás 11,30 horas, presentación do acto por parte do IEAMSO e intervencións da poeta Marta Dacosta e o biólogo e ecoloxista Ramón Varela ás 12,00; e ofrenda floral no monumento ás 13,30 horas. A clausura do acto correrá a cargo do grupo de gaitas ‘Folieiros’.
