Un mozo de 18 anos resultou ferido de gravidade ao impactar contra un autobús urbano cando circulaba en bicicleta polo centro da cidade de Vigo. Segundo informou a Policía Local de Vigo, o accidente produciuse ás 22,15 horas da noite do pasado domingo na confluencia entre as rúas Baixada Ponte Nova e Fonte Santa.

O ciclista impactou contra o autobús cando descendía por Baixada Ponte Nova e o vehículo viraba cara á rúa Fonte Santa. O mozo, de 18 anos, foi evacuado en ambulancia ao hospital Povisa, onde ingresou en estado grave, como apunta a Policía Local da cidade olívica.