A secretaria xeral do Partido Comunista de Galicia, Eva Solla, e Mauricio Valente, membro do secretariado do PCE, participaron este sábado no acto de conmemoración do centenario da organización, nun acto no que se reivindicou a necesidade de “mirar ao pasado” para “empuxarse cara ao futuro”.
O auditorio de Teis, en Vigo, acolleu este evento, no que se atoparon as xeracións máis novas e as maiores para dar testemuño da memoria de cen anos de traxectoria. Os valores do Partido Comunista de Galicia foron reivindicados como “a mellor ferramenta para facer fronte ás desigualdades que provoca o sistema”.
O evento estivo enmarcado nun ano de actividades en conmemoración dos cen anos que cumpre o Partido Comunista de España, como o certame de rap combativo, o de relato curto ou a exposición de Bernarda Espida, de Xavier Costa e outras moitas que foron organizadas no resto do Estado español. As distintas intervencións serviron para reivindicar a importancia histórica do partido no pasado e o papel que debe tomar no futuro.
Para Eva Solla, Secretaria Xeral do PCG, “a militancia é un exercicio de xenerosidade e solidariedade”. Por iso, expresou o seu agradecemento “a todas as persoas que deixaron a vida nestes cen anos na loita por facer un mundo mellor”.
Na súa Intervención, Mauricio Valente destacou que “se hai algo que destaca na historia do Partido Comunista, é a capacidade de adaptación, de aprendizaxe e de arraigamento social”.
