O deputado do BNG no Congreso, Néstor Rego, anunciou este luns a presentación de novas iniciativas e unha emenda aos Orzamentos Xerais do Estado (PGE) para 2022 co obxectivo de que o Goberno central acometa a eliminación do paso de nivel do Porriño con proxecto “ambicioso” e que mellore a integración urbana.

En declaracións aos medios durante unha visita a esta localidade, na que estivo acompañado polo concelleiro de Urbanismo porriñés, Pedro Pereira, o deputado nacionalista sinalou que pedirá a eliminación deste paso e o soterramento das vías de ferrocarril para “gañar espazo público” para os cidadáns.

Respecto diso, o deputado do BNG demandou “unha mellor integración no tramo urbano” e advertiu de que ese obxectivo “é perfectamente posible se hai vontade política” do Executivo central. Así, o BNG defenderá a supresión do paso a nivel e o soterramento das vías férreas a unha distancia de 700 metros da estación do Porriño.

Néstor Rego lembrou que xa no anteriores orzamentos o BNG presentou unha emenda para incorporar unha partida de 6,4 millóns de euros para a supresión deste paso a nivel

Por outra banda, rexistrará preguntas no Congreso para coñecer “a disposición” da ministra de Transportes, Mobilidade e Axenda Urbana e a posición de Adif sobre esta actuación. Do mesmo xeito, o BNG rexistrará unha Proposición Non de Lei para que todos os grupos con representación galega se sitúen.

Pola súa banda, o concelleiro Pedro Pereira recoñeceu que hai “avances” para levar a cabo esta actuación, pero pediu que esta sexa “ambiciosa e non hipoteque o futuro do Porriño”. Nese sentido, pediu que se alongue o taboleiro que propón Adif e comece o soterramento do trazado ferroviario a uns 700 metros, o que permitiría a conexión do tramo urbano coa senda verde impulsada polo BNG desde o goberno local.