O bispo de Tui-Vigo, Luís Quinteiro Fiuza, defendeu que el non impuxo “silencio a ninguén”, en resposta a un grupo de persoas laicas que pertenceron á Orde e Mandato de San Miguel Arcángel, coñecida como dos ‘Miguelianos’, que este xoves dixo que non falaron até o momento por ordes do bispo de Tui-Vigo de gardar “silencio”.
Ao ser cuestionado por este tema nunha rolda de prensa, Quinteiro limitouse a dicir que non impuxo silencio “a ninguén”, e engadiu que “por respecto á Xustiza” non ten “nada que dicir” sobre este caso, que se segue xudicialmente.
“Non é por capricho, teño unha misión e unha responsabilidade”, selou, após o que un portavoz do bispado agregou que “neste momento hai que respectar o que ocorra coa Xustiza, e no seu momento dirase o que se teña que dicir”.
