A Policía Local identificou a un furtivo reincidente, un home de 54 anos domiciliado en Vigo, M.A.M., que foi sorprendido tras recoller máis de dous quilos de ameixas na cidade, e trasladou os feitos á Xunta de Galicia para a súa sanción.

Fontes policiais detallaron que os feitos tiveron lugar o pasado venres, cando os axentes levaron a cabo labores de apoio e cobertura ao garda rural da Confraría de Pescadores de Vigo. Así, sobre as 13,15 horas, observaron como un furtivo recollía ameixas cun sacho na area da praia da Punta para logo deixalas nunha bolsa plástica.

Por iso, interviñeron os moluscos, cuxo peso superou os dous quilos, e o sacho, do que se fixo cargo o garda rural para a súa entrega á Xunta. Ademais, as ameixas devolvéronse ao mar e informouse ao home de que se daría conta á Administración autonómica para a súa sanción debido a que fora sorprendido mentres mariscaba de forma furtiva no barrio de Teis con anterioridade.

Por outra banda, pasadas as 13,00 horas dese mesmo día, os policías identificaron a un mozo de 29 anos domiciliado en Vigo, A.D.G.S., por mergullar na praia de Alcabre sen bolla de sinalización.