Axentes da Policía Local de Vigo denunciaron a dous condutores de ciclomotor por circular baixo os efectos do alcol e, nun dos casos, tamén por carecer de permiso para este tipo de vehículo. Segundo informaron fontes policiais, a primeira intervención tivo lugar na madrugada deste martes, cando unha dotación deu o alto a un mozo, I.S.T., de 21 anos de idade, que circulaba nunha bici eléctrica pola rúa Marqués de Valladares.
A bicicleta estaba modificada, coa incorporación dun motor, de maneira que se converteu nun ciclomotor. O seu condutor, con todo, carecía de calquera clase de permiso para levar este tipo de vehículo, que tampouco tiña seguro (e foi inmobilizado).
Ademais, ao entrevistarse con el, os funcionarios decatáronse de que presentaba síntomas de estar baixo os efectos do alcol. Así, ao realizarlle a preceptiva proba, esta arroxou un resultado positivo de 0,38 e 0,37 mg/l.
Por outra banda, na noite do martes, unha dotación do 092 interceptou a un condutor que circulaba pola Praza de Vilar sen iluminación e sen placa de matrícula no seu ciclomotor. Ao decatarse da presenza dos axentes, o condutor, R.L.S., de 31 anos de idade, detivo bruscamente a marcha e tirou o ciclomotor nuns arbustos, meténdose a continuación nun local.
Pouco despois, saíu do establecemento e foi identificado por un axente, que comprobou que tiña signos de estar baixo os efectos do alcol. Este extremo foi confirmado logo polo test, que arroxou un resultado de 0,73 e 0.73 mg/l. Por estes feitos, foi denunciado por un suposto delito contra a seguridade viaria, ademais de denuncia administrativa polo resto de irregularidades.
