Axentes da Policía Local de Vigo detiveron a un veciño da cidade, R.L.V., de 48 anos de idade e natural de Ourense, tras atacar presuntamente cun coitelo de cociña a outro veciño, ao que causou varias feridas na cara.

Segundo informaron fontes policiais, os feitos ocorreron na noite do pasado xoves, cando o 092 recibiu unha chamada alertando de que se estaba producindo unha pelexa entre dous veciños na zona de Camiño Ferreiras, e que un deles presentaba feridas por arma branca.

Ao chegar os axentes, observaron a un home de 56 anos de idade, sentado sobre unha pedra nunha leira, e coa cara ensanguentada. A poucos metros, na mesma leira, atopábase outro home, que portaba un coitelo de cociña, duns 18 centímetros de lonxitude.

Os policías entrevistáronse con ambos, pero estes declinaron explicar as razóns da disputa, aínda que confirmaron que tiñan denuncias mutuas por insultos e ameazas.

Ata o lugar desprazouse unha ambulancia do 061, cuxos técnicos confirmaron que o home ferido presentaba polo menos cinco cortes na cara. O ferido foi trasladado ao hospital Álvaro Cunqueiro da cidade olívica, e o presunto autor da agresión foi detido.