O Consello da Xerencia de Urbanismo do Concello de Vigo reunirase este xoves, en sesión extraordinaria, cun único punto na orde do día: a aprobación inicial do novo Plan Xeral de Ordenación Urbanística Municipal (PXOM) de Vigo.
Así o confirmou en rolda de prensa o alcalde olívico, Abel Caballero, quen explicou que, unha vez superado este paso, o documento será aprobado en Xunta de Goberno e, posteriormente, iniciarase a tramitación para levalo a Pleno. Deste xeito, está previsto que a novo PXOM sexa aprobado inicialmente nunha sesión plenaria a finais de agosto.
O alcalde de Vigo defendeu que o novo plan terá como foco a vivenda “a prezo alcanzable” (con 14.500 vivendas con algún tipo de protección pública), así como “o desenvolvemento do ámbito verde” e a “recuperación” de varias zonas da cidade agora degradadas.
A cidade olívica ten actualmente en vigor unha normativa urbanística que data de 1993, despois de que o Tribunal Supremo anulase o Plan Xeral aprobado en 2008. No entanto, algúns dos ámbitos de desenvolvemento de Vigo puideron saír adiante grazas á ordenación provisional e á lei autonómica 3/2016 (para iniciativas de interese público, como a estación intermodal de Urzáiz, ou a ampliación do Instituto Feiral).
