O consello de goberno Universidade de Vigo aprobou as memorias para a creación das facultades de Deseño e Dirección e Xestión Pública no campus de Pontevedra e da de Relacións Internacionais no de Ourense.
Na última sesión deste curso, deu luz verde ás memorias con 35 votos a favor, un en contra e dúas abstencións, mentres a docente da Escola de Enxeñaría de Telecomunicación Edita de Lorenzo considerou que a creación dos centros “non está xustificada”. Posteriormente, os documentos remitiranse ao Consello Social para a obtención do informe correspondente e á Xunta para continuar o procedemento coa previsión de que as facultades poidan iniciar a súa actividade no curso 2022-23.
Así mesmo, aprobáronse as memorias para as solicitudes de verificación e modificación de varios títulos que se impartirán desde o curso 2022-2023, entre eles, o Máster en Exercicio Terapéutico e Funcional en Fisioterapia. Así, esta titulación continuará a súa tramitación despois de que un ditame xurídico concluíse que non invadía competencias, como asegurara a dirección da Facultade de Ciencias da Educación e o Deporte.
Noutra orde de cousas, tras decidirse recentemente non trasladar ningún centro fóra do campus universitario, o reitor, Manuel Reigosa, confirmou a recepción do acordo da xunta da Facultade de Ciencias do Mar no que se considera que a mellor localización para o centro é a antiga ETEA. Así, o reitor comprometeu o alcance dunha solución e que “se poida mover con suficiencia e corrección”.
PLAN DE FINANCIAMENTO
En canto á negociación do próximo Plan de Financiamento Universitario, Reigosa explicou que “existen diferenzas importantes” entre a Xunta e as institucións educativas, que piden unha maior achega. Con todo, mostrouse “satisfeito” de “como van as cousas” en relación á procura dunha postura intermedia.
Finalmente, o consello de goberno deu luz verde ao primeiro estatuto do estudantado deportista da UVigo e ás solicitudes das facultades de Educación e Traballo Social, Ciencias da Educación e do Deporte e Química, e o Máster de Profesorado para impartir algunhas materias de modo non presencial desde o próximo curso. Adicionalmente, aprobáronse as sedes para o Programa Universitario de Maiores (PUM), que se situarán en Vigo, Pontevedra e Ourense.
