Axentes da Policía Local de Vigo detiveron a un home de 64 anos de idade, J.L.F., de Baiona, como presunto autor dun delito de violencia de xénero, tras agredir á súa parella, unha muller de 75 anos. Segundo informaron fontes policiais, os feitos ocorreron na madrugada deste domingo, cando o 092 recibiu un aviso por un suposto episodio de malos tratos na rúa Cambeses.

Cando a dotación acudiu ao lugar, atopouse coa vítima na rúa e esta relatoulles que, momentos antes, mantivera unha discusión no seu domicilio coa súa parella. No trancurso da rifa o home propináralle dúas puñadas no ollo dereito, mentres que ela agarroulle do pescozo para defenderse.

Tras zafarse do seu agresor, a muller saíu á rúa fuxindo, pero a súa parella seguiuna e, cando ela ía camiñando pola vía pública, suxeitouna polo pelo e empuxouna varias veces. O home mantivo esta actitude ata que unha veciña increpouno e se foi do lugar.

Os axentes acudiron ao domicilio para interrogar ao presunto autor dos feitos, que afirmou que fora el o agredido e que golpeara á muller para defenderse. En atención á versión da vítima, que presentaba lesións visibles no ollo, e tras escoitar á testemuña que chamou ao 092, os axentes procederon á detención do home, mentres que a muller foi trasladada en ambulancia ao Hospital Álvaro Cunqueiro de Vigo.