A Xunta de Galicia saíu ao paso das duras críticas realizadas este venres polo alcalde de Vigo, Abel Caballero, que tachou de “caradura político” e “patético” a Alberto Núñez Feijóo por izar a bandeira azul da praia de Rodas, nas illas Cíes, sen convidar ao rexedor e cando é un distintivo conseguido polo Concello.
Ante esas manifestacións, a delegada da Xunta en Vigo, Marta Fernández-Tapias, afirmou que o comportamento “cuestionable” foi o de Abel Caballero, xa que foi convidado formalmente o acto deste venres, no que participaron outros alcaldes, pero non asistiu “a pesar da insistencia da Xunta para que acudise, sen obter resposta”.
Por iso, acusou ao rexedor de “utilizar politicamente a súa ausencia premeditada para cargar contra o goberno autonómico”. “O que tería que explicar Abel Caballero é por que non acudiu ao acto, quizá para ter unha escusa para atacar de novo á Xunta?”, expuxo a delegada, quen sinalou que “o seu si é un bo exemplo de absoluta falta de lealdade e respecto”.
Fernández-Tapias, que tamén lamentou o “desprezo” de Caballero polo resto de alcaldes presentes no acto, lembrou que, aínda que o Concello encárgase do servizo de socorrismo da praia de Rodas, a xestión do Parque Nacional Illas Atlánticas (no que se inclúen as illas Cíes) corresponde á Xunta, que investiu no parque “15 millóns de euros nos últimos 5 anos”.
“Súa foi a decisión de non acudir ao izado de bandeira en Rodas, xa que o Concello de Vigo, do mesmo xeito que o resto de concellos, foi convidado oficialmente o acto de entrega de bandeiras azuis, que leva a cabo todos os anos nun dos municipios galardoados”, sentenciou a delegada da Xunta.
