A organización estudantil Erguer realizou este venres unha ocupación simbólica do edificio do Instituto de Formación Superior Intercontinental da Empresa (IESIDE), da obra social de Abanca, na Avenida de Madrid de Vigo, como acto protesta contra o modelo de universidade privada.
Segundo informou a propia organización, esta acción enmárcase dentro da campaña contra o proxecto de lei presentado pola Xunta e que permitirá a Abanca a creación dunha Universidade Intercontinental da Empresa.
Membros de Erguer entraron no edificio e entregaron unha carta dirixida ao director do centro, na que sinalan que esta universidade privada “non nace para liquidar unha demanda social”, xa o tres universidades públicas xa teñen unha “ampla oferta formativa”, senón que vai competir “” contra o actual sistema público. “Vemos unha vez máis a tentativa do PP de facer negocio cos dereitos básicos das estudantes, como é o acceso a unha educación pública de calidade, en favor dos intereses da elite social máis favorecida”.
Segundo denunciaron, a universidade pública está en situación de “precariedade”, agravada por “a falta de financiamento por parte da Xunta, a escasa oferta de bolsas, a prohibición de aumentar prazas nos graos, etc.”. Se a isto súmase a competencia desa nova universidade e a “fuga” do capital privado a ese tipo de proxectos, facilitarase a “eliminación” dos graos con menor demanda “e mesmo de campus universitarios”.
O alumnado, alertaron, non poderá acceder á universidade pública a prezos razoables “sendo a privada a opción máis suxestiva para aqueles que poidan asumir os custos”.
“A aprobación desta lei levará, por tanto, á implantación en Galicia dun modelo educativo elitista, antipedagóXico, antidemocrático, antiestudiantil e antigalego, ao ir en contra da propia lei do sistema universitario galego; ademais de xerar unha competitividade que as estudantes teremos que sufrir a curto e longo prazo”, sentenciaron.
