InicioSociedadeComuneiros de Tameiga insisten que as obras da cidade deportiva do Celta...

Comuneiros de Tameiga insisten que as obras da cidade deportiva do Celta son ilegais

A asociación celebra que o xulgado considere ilegais as obras do Celta en Mos.

PUBLICADO O

- Advertisement -

A Comunidade de Montes de Tameiga, en Mos, celebrou o fallo do xulgado do Contencioso Administrativo 3 de Pontevedra, que consideran que “tomba” a cidade deportiva do Real Club Celta, cuxas instalacións foron construídas en chan rústico na parroquia mosense de Pereiras.

O fallo do tribunal obriga ao Concello de Mos a revisar a licenza para construír os campos de adestramento, ao considerar que dita autorización debía outorgarse ao amparo dun Plan Especial de Dotacións e Infraestruturas (que non se fixo), e anula unha licenza posterior, para a construción de vestiarios e instalacións auxiliares, ao considerar que todo o complexo forma un único conxunto.

A sentenza baséase no feito de que as obras realizadas non se corresponden cunhas meras instalacións deportivas ao aire libre, senón que son equipamentos deportivos privados, e de maior entidade, polo que a súa construción non pode facerse cunha simple licenza municipal directa.

A Comunidade Montes de Tameiga mostrou a súa “satisfacción” pola resolución da xuíza, que estimou o recurso que presentaron contra os acordos de xunta de goberno que desembocaron na concesión das licenzas, e insistiron na “ilegalidade” das devanditas obras.

Os comuneiros incidiron en que a cidade deportiva do club celeste “carece de cobertura legal”, xa que o Plan Especial de Infraestruturas que o goberno local presidido por Nidia Arévalo “tentaba tramitar de modo ‘exprés'” foi informado desfavorablemente pola Confederación Hidrográfica Miño-Sil.

Así, a entidade felicitou a todos os veciños polo seu “tres anos de loita”, e por non ceder “ás ameazas, insultos e á campaña de fustrigación” levada a cabo pola rexedora, “principal promotora deste despropósito urbanístico”.

Finalmente, trasladou o seu desexo de que esta sentenza sirva de exemplo “para todos aqueles que, desde as administracións, pensan que poden obrar por encima da lei, e ás empresas que operan con tan malas prácticas como as do presidente do Celta, Carlos Mouriño”.

PETICIÓN DE DIMISIÓN DE NIDIA ARÉVALO

Pola súa banda, o PSOE de Mos esixiu a dimisión de Nidia Arévalo “por perpetrar a maior ilegalidade urbanística da historia recente de Galicia“. “Na súa obsesión, a alcaldesa levouse por diante a tres concelleiros de Urbanismo e arrastrou ao presidente da Xunta a unha inauguración escandalosa”, sinalou a portavoz socialista, Vitoria Alonso.

Segundo denunciou, a rexedora “avergoña e mancha o nome” dese municipio e “o único que pode facer” tras a sentenza “é marcharse canto antes, antes de ter que facelo por obrigación legal”.

A portavoz socialista apuntou que o ocorrido coas dúas licenzas “exprés” foi “unha crónica xudicial anunciada” e anunciou que non descarta acudir á Fiscalía “para que impulse un procedemento penal contra Arévalo”, ademais de estar a preparar unha denuncia “pola afección dos campos de fútbol e os vestiarios aos sistemas de abastecemento de auga veciñal”.

Finalmente, criticou a inauguración das instalacións do Celta, “tristemente encabezada” por Alberto Núñez Feijóo, que foi “involucrado nun asunto moi feo”, e denunciou que o Concello de Mos tamén tivo a “desvergoña” de organizar varios actos nesas instalacións “irregulares”.

ÚLTIMAS

De Baiona a Bruxelas: a iniciativa cidadá que cambiará a seguridade infantil nos coches europeos

Pedro Telmo, veciño de Baiona, impulsou unha campaña en Change.org que superou as 62.500...

O BNG esixe cambiar o plan de tráfico do Nadal de Vigo tras o “caos” do acendido das luces e o desfile de Disney+

O BNG de Vigo urxiu ao Goberno municipal que "rectifique" o plan de tráfico...

“Ameaza a supervivencia do barrio”: Lavadores mobilízase contra o proxecto de vivendas da Xunta

Máis de mil veciños do barrio vigués de Lavadores asinaron unha carta dirixida ao...

O histórico Teatro Fraga de Vigo volverá á vida: case 20 millóns de euros para unha reforma que comezará en 2027

O Consello da Xunta autorizou este luns a licitación das obras de restauración do...