O goberno municipal de Vigo emitiu un comunicado en resposta ás críticas do PP sobre a conexión ferroviaria da cidade con Madrid, e instou aos ‘populares’ a “pedir perdón” por paralizar o proxecto da variante de Cerdedo, e por pretender que os vigueses vaian á capital de España “parando” na estación de Santiago.
O PP anunciou este venres que presentará iniciativas nas diferentes cámaras para reclamar o AVE directo e para que se mellore a liña do Miño, despois da “baixada de pantalóns” do alcalde, do que lembraron que hai unhas semanas afirmaba que sería “inadmisible” ir a Madrid por Santiago e agora acepta esa ruta.
Respecto diso, o goberno municipal contraatacou acusando ao PP de estar “frenético” porque, segundo afirmou, o seu “obxectivo” era que os viaxeiros desde Vigo tivesen que parar na terminal compostelá. “E coa proposta pactada entre o Concello e Renfe, xa non entramos en Santiago nin baixamos do tren”, sinalaron fontes municipais nese comunicado.
Segundo o goberno encabezado por Abel Caballero, os ‘populares’ deben “pedir perdón” por parar “” a conexión directa por Cerdedo, que foi “recuperada polo goberno de Pedro Sánchez”. “Onde estaban cando esta cidade se manifestaba polo AVE, convocada polo alcalde; cando Ana Pastor parou a conexión por Cerdedo(…); cando Fraga renunciou ao AVE de Vigo?”, cuestionaron desde o goberno local.
Segundo incidiron desde o consistorio olívico, “o problema do PP é que agora sabe que se está avanzando nas conexións ferroviarias da cidade” e recalcaron que Vigo non renuncia á variante de Cerdedo. “Se fóra polo PP seguiriamos baixando do tren en Santiago, que é o que pretenden, e iso acabouse para sempre. De momento, xa non entramos en Santiago e imos polo camiño máis curto posible”, recalcaron.
