O comité executivo do Consorcio da Zona Franca de Vigo aprobou a comercialización de 39 parcelas —con 278.000 metros cadrados– da área Loxística Empresarial situadas na Plataforma Loxística de Salvaterra-As Neves (Plisan).
Segundo informou a Zona Franca este xoves, os prezos das parcelas de menos de 20.000 metros cadrados serán de 71,71 euros o metro cadrado, e os das parcelas que superen esa superficie serán de 53,21 euros o metro cadrado.
Así mesmo, o comité executivo tamén ratificou os acordos que permitirán formalizar os convenios para a construción das infraestruturas de gas natural e alimentación eléctrica nesta contorna.
O delegado do Estado no organismo estatal, David Regades, puxo en valor que “a Plisan xa está en marcha despois de conseguir desbloquear máis de 200.000 metros cadrados”. Ademais, lembrou que “dúas empresas xa iniciaron os traballos para establecerse neste novo polígono”: Albo e Beta Implants.
OUTROS ACORDOS
Doutra banda, na reunión aprobouse a cesión temporal ao Concello de Vigo dunha superficie de 4.600 metros cadrados na chaira fronte ao Real Club Náutico para atraccións e actividades relacionadas co Nadal. De ser autorizada pola Autoridade Portuaria, como titular da concesión, a cesión efectuaríase entre os meses de outubro e xaneiro por un período de catro anos.
Finalmente, o comité executivo acordou adxudicar o contrato de aluguer da nave 0 no edificio de oficinas do Consorcio en Bouzas a Reymo Export-Import, un espazo que a Zona Franca considerou que estaba “infrautilizado” e agora converterase nunha zona destinada a loxística e almacenamento.
