Segundo confirmou o presidente da Xunta, Alberto Núñez Feijóo, outros dous mariñeiros foron trasladados ao hospital nas últimas horas, polo que actualmente son catro os que se atopan ingresados no Vithas Fátima de Vigo, aínda que todos eles en planta.

O resto da tripulación –formada en total por 22 persoas–, atópase en seguimento médico dentro do barco, engadiu Feijóo. Entre a tripulación do barco detectáronse por parte das autoridades sanitarias galegas seis casos de covid-19, dos que cinco foron remitidos a secuenciación por sospeita de variante india.

O Hospital Vithas de Vigo rexistrou onte á noite o ingreso dun terceiro mariñeiro do barco de carga atracado en Vigo, o Prometheus Leader, cun brote de covid-19 coa variante india.

Trátase dun home de 52 anos, segundo confirmaron fontes do hospital, quen foi trasladado ao centro médico tras atoparse mal e que xa estaba no grupo do seis mariñeiros diagnosticados positivo no barco. E este luns ingresou un cuarto. Segundo o Servizo Galego de Saúde (Sergas), trátase da variante B1.617 subvariante 2, que é sensible á vacina.A alarma saltou o pasado xoves, cando se soubo que se produciu un brote de Covid a bordo deste barco con bandeira Singapura, cuxa tripulación é de orixe india e filipino.

Algúns dos membros da tripulación estiveron recentemente en Nova Deli, desde onde voaron a Reino Unido para unirse á tripulación, de 22 membros, e partir desde Southampton.