O Consello Xeral de Enfermaría emitiu un comunicado no que se pon a disposición da xustiza e dos investigadores para “colaborar en todo o necesario”, en relación coa suposta xestión irregular investigada no Colexio de Enfermaría de Pontevedra, cuxo presidente, Carlos Fernández, así como a súa muller e a súa filla, ingresaron en prisión provisional, investigados por branqueo, falsidade e administración desleal.
“Lamentamos profundamente a situación, así como o feito de que a profesión enfermeira, un colexio profesional neste caso, teña que verse relacionada coas informacións publicadas nos medios por uns supostos feitos de natureza delituosa”, reza o comunicado do Consello.
Nesta situación, o organismo trasladou a súa disposición a colaborar coa xustiza e contribuír a “devolver a normalidade ao Colexio de Enfermaría de Pontevedra cando antes”.
Segundo lembrou o Consello, desde hai anos mantén un conflito legal co Colexio pontevedrés pola falta de pagamento de cotas, que se remonta a case 20 anos. De feito, o órgano colexial acumula dúas condenas por esa falta de pagamentos, que suman máis de 6 millóns de euros.
O Consello Xeral de Enfermaría espera agora que se aclare se o Colexio contará ou non cun administrador xudicial co que tratar a “débeda acumulada” e manifestou o seu interese en “buscar solucións que permitan garantir a estabilidade futura do Colexio en materia económica”.
Finalmente, defendeu que, xunto a toda a organización colexial, trabállase na implantación dun novo modelo de xestión “exclusivamente baseado no bo goberno, a transparencia e a xestión responsable, en beneficio e defensa da profesión enfermeira”.
