O delegado do Goberno en Galicia, Javier Losada, informou este mércores de que a segunda administración de Asistencia DigitalIntegral (ADI) da Axencia Tributaria en España estará en Vigo. Explicouno tras a confirmación no Boletín Oficial do Estado (BOE) da creación da oficina.
O Ministerio de Facenda realizou unha primeira proba piloto en Valencia e agora dálle continuidade cunha nova oficina en Galicia. Está previsto que as outras sedes da Administración Dixital estean na Comunidade de Madrid e en Andalucía.
En concreto, a Axencia Tributaria crea este novo mostrador dixital “deseñado baixo a premisa de facilitar o cumprimento voluntario con máis e mellor información e asistencia ao contribuínte”.
“Complementando a axuda presencial tradicionalmente prestada nas oficinas físicas, que continuará como ata agora, desde a ADI máis de 300 funcionarios especializados dedicaranse en exclusiva a atender de forma personalizada non presencial a contribuíntes de todo o territorio estatal“, indica a Delegación do Goberno.
