A sala do Contencioso Administrativo, sección segunda, do Tribunal Superior de Xustiza de Galicia (TSXG) ditou unha sentenza na que desestima a demanda dunha das empresas que concorreu á licitación do servizo de estacionamento de ‘zona azul’ de Vigo, e avala a adxudicación, realizada polo goberno local en decembro de 2017, á empresa Dornier.

A empresa recorrente, Setex Aparki, impugnou a adxudicación desa concesión (cun contrato por valor de 23,4 millóns de euros) porque entendía que a oferta gañadora, a de Dornier, debía excluírse do proceso ao incorrerse nunha serie de supostas irregularidades. Así, entre outras cuestións, Setex alegou que había unha incongruencia entre a oferta técnica e a económica, en relación ao número de postes de recarga de vehículos eléctricos.

Nunha primeira instancia, o Tribunal Central de Recursos Contractuais desestimou as pretensións de Setex Aparki, e agora o TSXG pronunciouse no mesmo sentido.

O alto tribunal galego entende que o “erro aritmético” no reconto de postes de recarga non altera a oferta económica e, doutra banda, tamén rexeita o argumento da recorrente, de que a súa oferta técnica non cumpría o prego, en relación ao consumo enerxético dos parquímetros. Respecto diso, o TSXG lembrou que hai un certificado do fabricante que avala que as características deses parquímetros axústanse ás condicións previstas no prego.