Unha alusión do presidente do Parlamento galego, Miguel Santalices, ao pleno municipal de Vigo, durante a sesión plenaria deste mércores na Cámara autonómica, provocou as críticas do PSdeG, que esixiu “respectar á administración local”.
A intervención obxecto de polémica produciuse no momento no que Feijóo finalizaba a súa réplica ao secretario xeral do PSdeG e portavoz socialista, Gonzalo Caballero, durante a sesión de control do Parlamento. O presidente da Cámara, Miguel Santalices, emprazou á bancada socialista a gardar silencio e a non interromper a intervención.
En concreto, dirixiuse á deputada viguesa (e exconcelleira do concello olívico) Isaura Abelairas á que advertiu: “Xa lle dixen outra vez, que hai que estar máis tranquila. Isto non é o pleno de Vigo”.
Ante estas manifestacións, o líder dos socialistas galegos expresou o seu rexeitamento e instou ao presidente do Parlamento a “respectar á administración local”. “Eu respéctoa, se cadra máis que vostede”, replicou Santalices, que pediu un bo comportamento no Hemiciclo.
“MAMPORRERO DE FEIJÓO”
Pola súa banda, o secretario xeral da agrupación socialista de Vigo, Abel Losada, nunhas declaracións remitidas aos medios, tachou de “vergonzo” o ocorrido e denunciou que, “ante a crítica política”, o presidente do Parlamento “converteuse nun mamporrero de Feijóo”.
“Xa nos queda claro por que o fixeron presidente do Parlamento. Para que se convertese, nun acto de matonismo político, en defensor do goberno de Galicia desde a presidencia da Cámara”, sentenciou Losada, quen engadiu que o ocorrido “é absolutamente lamentable en termos de calidade democrática”.
