O brote de coronavirus detectado hai case 10 días na área de Xeriatría do hospital Meixoeiro de Vigo suma en total uns 55 casos, concretamente 35 pacientes e aproximadamente unha vintena de profesionais.
Así o comunicaron este martes fontes do Servizo Galego de Saúde (Sergas), tras o que indicaron que este brote “aínda non se considera pechado”, posto que continúan os estudos epidemiolóxicos para tratar de descartar máis casos.
De acordo con estas fontes, os pacientes que se viron afectados estaban ingresados no servizo de Xeriatría por outras patoloxías, aínda que tras detectarse un primeiro caso de COVID localizáronse varios máis.
Os pacientes que deron positivo foron trasladados ao Hospital Álvaro Cunqueiro de Vigo, no que se centraliza a atención a pacientes por COVID, mentres que os profesionais non tiveron que ser hospitalizados.
