A Fiscalía pide penas que suman 12 anos de cárcere para un home acusado de abusar sexualmente dunha nena de forma continuada durante os tres anos nos que conviviu coa menor e a súa familia. Será xulgado este mércores na sección quinta da Audiencia Provincial de Pontevedra, con sede en Vigo.
Segundo o escrito de acusación pública, o procesado viviu nunha casa, no verán de 2011, xunto a outro home, a súa muller e a filla desta, de 9 anos de idade. Ao pouco de empezar a convivencia, empezou a acudir polas noites á sala na que durmía a nena, practicamente a diario, e realizáballe tocamentos nos peitos e na vaxina, á vez que lle pedía que non llo contase “a ninguén”.
En outubro dese ano, a familia, incluído un irmán da nena, trasladouse a vivir á casa da avoa materna da menor, e pouco despois, o acusado tamén se aloxou nesa vivenda, de modo que os abusos continuaron ata finais do ano 2014.
ABUSO CONTINUADO
Nalgunha ocasión, o home espiuse ante a nena e tentou quitarlle a ela a roupa, pero acabou desistindo polos berros da menor. Nunha noite indeterminada de 2014, relata a Fiscalía, a avoa da menor sorprendeu o acusado tombado xunto á nena ensinándolle vídeos de contido pornográfico, polo que o botou da súa casa.
O ministerio público considera o procesado autor de dous delitos continuados de abuso sexual a menor, e pide que sexa condenado a un total de 12 anos de cárcere. Así mesmo, reclama que se lle prohiba achegarse á vítima por un período de 14 anos e que a indemnice en 6.000 euros polos danos morais.
CONDUTA “NEGLIXENTE” DO PROXENITOR
Por outra banda, a Fiscalía pide o sobresemento das actuacións con respecto ao pai da nena porque, aínda que hai indicios de que puido ter coñecemento do primeiro delito de abuso sexual, non hai probas da súa participación, nin tampouco de que tivese coñecemento do segundo delito.
No entanto, a acusación pública reproba a actitude “neglixente e apática” do proxenitor, por non denunciar os feitos e permitir ao acusado volver convivir coa familia, sen vixiar que a menor estivese a salvo.
