O Porto de Vigo pechou o ano 2020 cun aumento do 3,3 % no seu tráfico total a pesar da pandemia de COVID, que provocou a cancelación de escalas de cruceiros e a paralización da Autoestrada do Mar, e logrou superar os 4,5 millóns de toneladas movidas.
Así, segundo informou este xoves a Autoridade Portuaria olívica, o pasado ano o tráfico de mercadorías creceu un 4,12 %, e tanto as exportacións como as importacións experimentaron subidas.
Á marxe da pesca fresca, que non logrou remontar e acabou 2020 cunha caída do 6,51 %, houbo incrementos noutras mercadorías como a froita (+955,8 %), os alimentos (+59,06 %), o granito elaborado (+11,3 %), as conservas (+7,78 %) ou os automóbiles (+3,96 %).
Con respecto ao tráfico de colectores, o balance tamén foi positivo grazas, sobre todo, aos movementos no peirao de Guixar, cunha subida xeral do 12,36 %. Así mesmo, o tráfico de TEUs experimentou un incremento do 5,67 %.
As boas cifras de peche da terminal viguesa en 2020 débense fundamentalmente aos bos datos do segundo semestre do ano, no que o Porto experimentou unha recuperación notable, tendo en conta de que pechou o primeiro semestre do ano pasado cunha caída nos seus tráficos do 7 %.
