O alcalde de Vigo, Abel Caballero, denunciou este luns que a Xunta de Galicia “deixa tiradas” ás familias ameazadas de desafiuzamento na cidade, ás que “ten que atender o Concello”, e criticou que o goberno autonómico non entregou “nin unha soa vivenda pública” que construíse durante o mandato de Feijóo na cidade.

Nunha rolda de prensa, o rexedor olívico sinalou que, na cidade, “hai 20 familias pendentes de desafiuzamento”, entre as que está unha nai con 4 menores ao seu cargo. “E a resposta da Xunta a esta nai é que non dispón de vivendas neste concello, nin hai axudas abertas para atendelos. Déixanos tirados na rúa”, censurou. Na mesma liña, referiuse a as familias que serán desaloxadas en febreiro dun poboado chabolista en Navia, e que tamén están “sen resposta da Xunta”.

“Somos nós (a administración municipal) os que os atendemos (…), a Xunta di que non ten vivendas nin axudas. Se da Xunta dependese, quedarían todos na rúa”, criticou Abel Caballero, quen denunciou que, desde que Feijóo goberna, a administración autonómica non entregou “nin unha soa vivenda social feita polo seu goberno”. “Isto é un drama social“, proclamou o rexedor, que lembrou que, só en Vigo, hai máis de 4.200 familias demandantes de vivenda protexida “en lista de espera”.