O BNG de Vigo criticou este xoves o “desprezo” e “descualificacións” do alcalde da cidade, Abel Caballero, cara a quen non están de acordo con el, e tachou de “inaceptable” ese “talante autoritario”.
Así o trasladou a través de redes sociais o concelleiro nacionalista Xabier Pérez Igrexas, quen cualificou como “actuación ridícula” a rolda de prensa na que o alcalde, este xoves, criticou o deputado do BNG, Néstor Rego, por pedir no Congreso a paralización da obra do túnel da Porta do Sol.
Nesa comparecencia ante os medios, o rexedor referiuse a Néstor Rego como un “deputado pola Coruña”, “da UPG, do sector marxista leninista, que quere separar Galicia de España” e que “non se decata do que fala”.
Xabier Pérez Igrexas lembrou que ese “talante autoritario” de Caballero, “descualificando” a quen discrepan, “non é novo, pero resulta inaceptable”, e “causa pena ver este nivel de degradación”. A ese respecto, o edil do BNG engadiu que “o grave” non é só que falte “sistematicamente” ao respecto a quen opinan diferente, senón que, con actuacións como a deste xoves, “falta ao respecto á propia Alcaldía e á cidade”.
“Estou seguro de que moitas persoas que o votaron non están de acordo con ese comportamento antidemocrático e intolerante. Nin con que confunda a súa lexítima maioría absoluta cunha ditadura romana na que pode facer e desfacer sen escoitar a ninguén”, apuntou Pérez Igrexas, quen afirmou que o BNG de Vigo non entrará “nese xogo embarrado que empobrece e embrutece a política municipal”.
“Seguiremos empuxando en positivo o novo pulo que necesita Vigo, acompañando cada crítica dunha alternativa e cada denuncia dunha proposta”, resolveu o concelleiro nacionalista.
