Os sindicatos CIG, UGT, USO, CXT e Comisións Obreiras (CC.OO.), que ostentan a maioría no comité da planta de BorgWarner en Vigo, iniciarán o luns mobilizacións para reclamar un novo convenio “digno” e “evitar a perda de postos de traballo” fronte ao “ultimato” dado desde a compañía.

As organizacións lembran que a negociación dun novo convenio colectivo –o anterior terminou a súa vixencia en 2019– interrompeuse entre xullo e outubro debido á presentación dun ERE que afectaba a máis de 100 traballadores.

Este asunto finalizou cun acordo en mediación que contemplaba decenas de saídas voluntarias e a partir de novembro retomouse o diálogo para o convenio. Así, o mércores desta semana, día 2 de decembro, constituíuse unha nova mediación ante o Consello de Relacións Laborais de Galicia.

No marco deste encontro, os sindicatos denuncian que a parte empresarial deu “un ultimato” á parte social e un prazo ata o 11 de decembro “baseándose na aceptación de numerosos recortes económicos”.

“De non chegar a un acordo nesa data, non se asignarán novos proxectos á fábrica de Vigo, o que á súa vez levaría ao peche da planta”, aseveran, á vez que advirten contra o traslado de carga de traballo cara á planta de BorgWarner en Viana do Castelo (Portugal).

Esta situación contrasta, afirman as organizacións, co feito de que a planta de Vigo é “moi rendible, con beneficios que creceron aínda máis no período do último acordo en vigor, desde 2016 ata 2019, sendo unha fábrica moi competitiva a nivel económico e técnico”.

Por todos estes motivos, os cinco sindicatos queren mostrar o seu rexeitamento ante o “ultimato” da empresa con mobilizacións a partir deste luns, aínda que avisan que emprenderán “todas as medidas necesarias, tanto dentro da negociación como fóra, para evitar a perda de postos de traballo e a consecución dun acordo digno”.