O edificio situado na esquina de Urzáiz con Vázquez Varela en Vigo, deseñado a principios do século XX por Jenaro de la Fuente e rehabilitado por Ceetrus para destinalo a uso hoteleiro, foi merecedor do Premio Aproin á “mellor rehabilitación”.
Así, a Asociación de Promotores Inmobiliarios de Pontevedra recoñeceu a obra impulsada por Ceetrus Urban Player Spain, e cuxa restauración, a cargo da construtora Civis Global, foi dirixida polo arquitecto Jorge González de la Fuente.
O inmoble será un hotel con 24 habitacións, salas de reunións, ximnasio e unha terraza, na que se celebrarán concertos e diferentes eventos.
O establecemento ofrecerá servizo de aloxamento ao centro Vialia e á estación ferroviaria de Urzáiz, cuxa construción tamén leva a cabo Ceetrus, baixo o deseño do arquitecto Thom Mayne. A promotora confirmou que está “en negociacións” con varias empresas do sector para “buscar un operador que xestione o hotel”.
Os premios Aproin recoñecen cada ano as mellores actuacións en edificios da provincia de Pontevedra, tanto en categoría de nova planta como en rehabilitación, aínda que a entrega de galardóns do ano 2019 pospúxose debido á pandemia de COVID.
