O persoal de limpeza do Hospital Álvaro Cunqueiro de Vigo mobilizouse este venres para reclamar o reforzo do persoal (da concesionaria Acciona) e avanzou que, se o Sergas non atende ás súas demandas, as mobilizacións pasarán a ser diarias a partir da próxima semana.

Segundo informou o sindicato CIG a través dun comunicado, o comité de empresa denunciou que o incremento de protocolos e esixencias derivados da pandemia de COVID está a xerar unha sobrecarga de traballo aos empregados, e unha “tensión prolongada”, precisamente por falta de persoal.

A central nacionalista lembrou que, xa desde o pasado 13 de marzo, os traballadores estiveron pedindo a Acciona e ao Sergas que reforzase o servizo, tal e como se fixo noutros hospitais. “Pero no Álvaro Cunqueiro non se fixo nada, seguramente porque é un hospital privatizado, e as empresas que o xestionan non queren investir”, apuntou a CIG.

O comité sostén que as súas demandas son “razoables” e reclaman dúas persoas máis para a quenda de noite e 15 máis para o resto de unidades. Así, explicaron os representantes dos traballadores, neste momento encárganse só 6 ou 7 persoas da limpeza de todo o hospital polas noites.

A CIG denunciou que a resposta da empresa foi facer 6 novos contratos, co pretexto de que o Sergas “non demanda máis limpeza”, e pediron reunións tanto coa xerencia do hospital como coa propia concesionaria. A ese respecto, tamén criticaron a carencia de material de protección e denunciaron que están a limpar habitacións de enfermos de COVID levando “só unha máscara cirúrxica”.

Por outra banda, o sindicato confirmou a presentación dunha denuncia ante a Inspección de Traballo polo “intento” de Acciona de implementar un sistema de recollida de residuos COVID con caixas de cartón, en lugar de colectores de plástico habilitados para ese tipo de residuos.