A Asociación de Industrias do Metal e Tecnoloxías Asociadas de Galicia (Asime) promove a inserción laboral dun centenar de desempregados mediante un programa de prácticas levado a cabo en empresas do sector situadas nas zonas de Vigo e Narón.
Nun comunicado, Asime detallou que esta iniciativa se enmarca no Programa Integrado de Emprego, subvencionado pola Xunta e o Goberno central. Así, o secretario xeral da entidade, Enrique Mallón, explicou que se busca “solucionar a brecha existente entre a demanda de perfís e a cualificación dos traballadores”, ademais de xerar emprego e potenciar o crecemento do sector industrial.
En concreto, Asime promove desde hai un ano iniciativas personalizadas de formación, orientación e intermediación laboral relacionadas con soldadura, tubaxe industrial, carretillería, mantemento, fabricación mecánica e actividades auxiliares de almacén.
Os beneficiarios do programa son demandantes de emprego de colectivos vulnerables, novos, maiores de 45 anos e mulleres. Deste xeito, diversas empresas do sector acollen a alumnos en prácticas, o que permite que contribúan á súa especialización e o futuro desenvolvemento das súas carreiras profesionais.
