A Mancomunidade de Montes de Vigo, que aglutina a 14 comunidades de montes veciñais do municipio, conmemorou este xoves o terceiro aniversario dos incendios que, en outubro de 2017, arrasaron máis de 560 hectáreas de zona forestal viguesa. Así, nun acto no que tamén participou o alcalde da cidade, Abel Caballero, os comuneiros descubriron unha placa en recordo dese episodio e da solidariedade dos veciños e forzas de emerxencias na loita contra o lume.
Esta entidade fixo público un manifesto, con motivo desa efeméride, no que lembrou que os montes de Vigo seguen á espera de que se concrete a creación dun “anel verde” para previr futuras catástrofes incendiarias e protexer os montes e a cidade.
A ese respecto, lamentaron que a Xunta non respondese ao proxecto enviado desde o Concello (segundo trasladaron fontes municipais á Mancomunidade) e pediron superar ese “atasco administrativo” para executar esa actuación.
Os comuneiros advertiron de que son necesarias medidas “estruturais” e “contundentes” en materia de prevención porque o cambio climático provoca que os incendios sexan máis graves e frecuentes, e é máis rendible investir en prevención e conservación que en extinción.
Segundo sinalaron as comunidades de montes, desde 2017 leváronse a cabo labores para recuperar as áreas queimadas, como a retirada de madeira ou a reforestación.
Con todo, advertiron de que as actuacións se están executando con atraso por falta de recursos. Así mesmo, pediu que se amplíen as axudas para a contratación de persoal de brigadas, xa que o actual servizo (cuxo persoal subvenciona o Concello) non é suficiente para cubrir as necesidades de todos os espazos forestais vigueses.
ABEL CABALLERO
Pola súa banda, o alcalde, Abel Caballero, subliñou que esa noite de outubro de hai tres anos foi “un momento dramático” na cidade, que fixo fronte ao lume “cos seus propios medios”, “sen axuda” da Xunta, que “non enviou recursos”. “Vigo quedou soa, a Xunta non enviou axuda”, denunciou.
Así mesmo, anunciou que a Xunta de Goberno Local aprobará este venres o expediente para a contratación dunha empresa que se encargará da limpeza de leiras en franxas secundarias, unha tarefa que asume o Concello cando os propietarios non acometen esa limpeza.
A ese respecto, o rexedor criticou que a Xunta “delega nos concellos” cuestións que son da súa competencia, e os municipios non reciben recursos para levalas a cabo.
