A Policía Local de Vigo participou na pasada madrugada en senllos operativos contra festas que congregaban a varias persoas sen respectar as medidas de seguridade marcadas pola pandemia. Unha delas, a duns aniversarios con 34 persoas nun bar de copas.
Segundo informan fontes municipais, os axentes acudiron a este local situado na rúa Ramón Nieto ao redor das 6,00 horas da mañá en apoio á Policía Nacional.
Os actuantes identificaron un total de 34 persoas no interior e procederon a desaloxar o establecemento por incumprir horarios de apertura e a capacidade permitidos.
Por outra banda, dúas unidades da Policía Local acudiron na pasada madrugada a disolver unha celebración cunha vintena de persoas nun chalé na zona de Canido despois de que unha veciña alertase dos ruídos.
Ademais, informan as mesmas fontes municipais, os axentes tamén desaloxaron unha festa nun piso de estudantes na rúa Marqués de Valladares, entre outras actuacións na madrugada deste luns que é festivo nacional.
